sub1SELECT imagen FROM sub_secciones_web WHERE id='61'
Centro de Recepción e Interpretación del Prerrománico Asturiano
Facebook
Twitter
Instagram
Youtube
App Móvil

En Oviedo

Santa María de Naranco

Información xeneral

Santa María de Naranco ye unu de los monumentos más enigmáticos y harmoniosos de la hestoria de l´arquitectura occidental. El so tipu nun encaxa ente los d´usu llitúrxicu, teniendo que pensase n´antecedentes civiles, de los que´l raigañu -polos motivos decorativos y iconográficos y el diseñu de les fachaes- paez atopase na arquitectura tardoantigua y paleobizantina del Próximu Oriente.

Les cróniques asturianes son unánimes al atribuyir a Ramiro I (842-850) una llabor constructiva importante nel monte Naranco.

Formando probablemente parte d´un conxuntu d´edificios más ampliu, destináu a residencia fixa o ocasional del promotor, funcionó como templu siquiera dende los años iniciales del sieglu XII hasta la so restauración nos años 1929-1934. La denominación cola dedicación a Santa María deriva de la inscripción del altar que se recuperó ente la mampostería del retablu-altar esistente nel mirador oriental. Esti altar llevantóse nel añu 848.

La so estructura, perfectamente simétrica, consta de dos plantes, estremaes en tres dependencies. Na planta inferior, a ras de suelu, atópase una sala central, flanqueada al Este por un cubículu soterrañu, que la so función inicial tuvo que ver col almacenamientu d´agua, y al Oeste por una habitación con accesu esterior. La planta cimera reproduz esta triple disposición, consistiendo nuna sala central y dos miradores llaterales, abiertos al esterior per aciu d´amplies arqueríes. Miradores superiores y sala inferior tán abovedaos con cañones articulaos con arcos faxones. Les dependencies llaterales de la planta baxa cúbrense con forxaos de madera. Los faxones de la planta cimera, les arquerías ciegues y los contrafuertes de les fachaes Norte y Sur tán enllazaos nun sabiu sistema de contrarrestu de sofitos, lo que dexó al proyectista abrir ventanales amplios y vanos nos paños murales de rellenu.

Al costáu Norte asítiase un templete cola escalinata de xubida a la planta cimera, provistu igualmente de vanos baxo arcos peraltaos y fustes sogueaos. Na fachada opuesta dispúnxose un mirador saliente, de doble alzáu, del que namá se caltien la planta y los arranques de los murios inferiores, amás de los enxareyaos de les dos bóvedes que cubrieron los sos dos pisos.

El pisu cimeru esfruta d´una riqueza decorativa escultórica insólita en cualesquier otru edificiu coetaneu, y de una bien notable coherencia estilística. Esta escultura arquitectónica compónse de cuatro series de capiteles, sobre fustes helicoidales o sogueaos, 32 medallones empotraos nes enxutes de los arcos de les paredes interiores y esteriores, 16 plaques rectangulares asitiaes nos llaos mayores del interior de la sala central, llínies d´imposta y cruces esculpíes nos llaos menores, a lo qu´hai qu´añedir les acanaladures que percuerren les rosques de tolos arcos y los estribos. L´edificiu nun participa de nenguna de les característiques arquitectóniques que definen los templos, nun siendo la so perfecta orientación según la exa Oeste-Este. La iconografía, sicasí, compónse de motivos relixosos (cruces, profetes, individuos con traxe talar).

Datos d´interés

Accesos
Uviéu. Costera del Monte Naranco.
(a 3 Km. d´Uviéu).

Bus llínia A1 y A2. Información horarios y paraes: www.tua.es.

Visites

Contactu:
Tfnu: 985 21 26 60 (parroquia) - 638 26 01 63 (guardesa).

Horariu:

Del 1 de xineru al 31 de marzu y del 1 de ochobre al 31 de avientu:
De martes a sábadu, de 10:00 a 14:30 h. (últimu pase).

Domingos y 31 d′avientu , de 10:00 a 12:30 h. (últimu pase).

Cerráu, 1 y 6 de xineru, 11 d´ochobre, 1 de payares y 6, 24 y 25 d′avientu.

En Navidá preguntar horariu.

Del 1 d´abril al 30 de setiembre:
De martes a sábadu, de 09:30 a 13:00 y de 15:30 a 19:00 h. (últimu pase).

Domingos, de 09:30 a 13:00 h. (últimu pase).

Llunes: accesu gratuitu de 09:30 a 13:00 hores (ensin guía).

Cerráu, 31 de xunetu, 8 y 21 setiembre et del 4 d′ochobre hasta nuevu avisu.

Observaciones

Tarifes
Xeneral: 4 €.

De 8 a 14 años: 3 €.

Grupos: 3 €.

Grupos de neños/es: 2 €.

Llunes: accesu gratuitu de 09:30 a 13:00 hores (ensin guía).

Otros descuentos, consultar.


Les entraes pa visitar St.ª María de Naranco y San Miguel de Lliño cómprense en St.ª M.ª de Naranco.

Los llunes de inviernu Santa María abre a les hores en punto y San Miguel de Lillo a les hores y media y los llunes de branu Santa María abre a les hores y media y San Miguel de Lillo a les hores en punto.


Más información: www.santamariadelnaranco.es.